Англия лига кубоги 2-раундидан ўрин олган баҳс «Гримсби Таун» (Англиянинг 4-дивизиони) ҳамда «Манчестер Юнайтед» жамоалари ўртасида бўлиб ўтди. Учрашув Клиторпс шаҳридаги 9546 томошабинга мўлжалланган «Бланделл Парк» стадионида ўтказилди.

Асосий вақт 2:2 ҳисобида якунланди. Пенальтилар сериясида эса мезбонлар аниқроқ ҳаракат қилишди — 12:11.

22-дақиқада мезбонлар яримҳимоячиси Чарльз Вернам ҳисобни очди. 30-дақиқада ҳимоячи Тайрелл Уоррен «Гримсби Таун» устунлигини икки баробарга оширди.

75-дақиқада «Манчестер Юнайтед» ҳужумчиси Брайан Мбемо бир гол билан жавоб қайтарган бўлса, 89-дақиқада ҳимоячи Гарри Магуайр ҳисобни тенглаштирди.

Пенальтилар сериясида жами 26 зарба ижро этилди, ҳал қилувчи зарбани Мбемо голга айлантира олмади.

Турнирнинг амалдаги ғолиби «Ньюкасл» бўлиб, жамоа ўтган мавсум финалида «Ливерпуль»ни 2:1 ҳисобида мағлуб этган эди.

Англия лига кубоги. 2-босқич
27 август 2025 йил, чоршанба.
Гримсби Таун (Клиторпс) — Манчестер Юнайтед (Манчестер) - 2:2
Пенальтилар серияси — 12 : 11
Голлар: 1:0 — Вернам, 22', 2:0 — Уоррен, 30', 2:1 — Мбемо, 75', 2:2 — Магуайр, 89'