"Манчестер Юнайтед" ҳужумчиси Расмус Хёйлунд фаолиятини "Наполи"да давом эттиради.
Келишув клублар ўртасида келишилган, данияликнинг ўзи ҳам трансферга розилик берган. Нуфузли инсайдер Фабрицио Романонинг маълум қилишича, "Наполи" 22 ёшли футболчининг ижараси учун 6 млн евро тўлайди, сотиб олиш эса 44 млн еврога тушади. Расмий тасдиқни кутиш қолди, холос.
Расмус "Манчестер Юнайтед"да икки йил ўтказди. 2023 йилнинг ёзида "қизил иблислар" уни "Аталанта"дан қарийб 80 млн еврога сотиб олган эди. Ҳужумчи Англияда кутилган натижани яққол кўрсата олмади ва манкунианликлар сафида барча мусобақаларда 96 та ўйинда 26 та гол урди.













