"Манчестер Юнайтед" ҳужумчиси Матеус Кунья Бразилия терма жамоасининг сентябрь ойидаги йиғинини ўтказиб юборишга мажбур бўлмоқда.
26 ёшли футболчи АПЛнинг шанба кунги "Бёрнли"га қарши ўйинида мушакларидаги жароҳат туфайли 31-дақиқада захирага олинди. "Қизил иблислар" ва "селесао" шифокорлари маслаҳатлашиб, футболчи терма жамоалар ўйинлари учун халқаро танаффус пайтида Англияда қолгани маъқул деган хулосага келди, деб хабар беради UtdDistrict. Шу тариқа, форвард 5 ва 10 сентябрь кунлари бўлиб ўтадиган жаҳон чемпионати саралашида Чили ва Боливия терма жамоаларига қарши ўйинларда "пентакампеонлар"га ёрдам бермайди.
Маълумот учун, Матеус Кунья жорий мавсум старти олдидан "Вулверхэмптон"дан "Манчестер Юнайтед"га кўчиб ўтган эди. Трансфер қиймати 74 млн еврони ташкил этган.
