Англия терма жамоасининг собиқ ярим ҳимоячиси Деле Алли энди Италиянинг «Комо» жамоаси сафида тўп сурмайди. BBC хабарига кўра, футболчи ва клуб шартномани муддатидан олдин бекор қилишга келишиб олди. «Тоттенхэм»нинг собиқ ўйинчиси 2025 йил январь ойида жамоага қўшилган эди.
Деле Алли «Комо» сафида фақат бир ўйинда майдонга тушди. 2024/2025 йилги мавсумнинг А Серия 29-туридаги учрашувда (1:2) у 81-дақиқада захирасидан майдонга тушди ва 90+1-дақиқада тўғридан-тўғри қизил карточка олди. Шундан кейин у бошқа ўйинларда майдонга чиқмади, янги мавсумда эса умуман қайдномага киритилмади.
Шу тариқа, 29 ёшли ярим ҳимоячи эркин агентга айланади. Аввалроқ, Алли 2024 йилнинг июлидан 2025 йил январга қадар «Эвертон»дан кетганидан кейин беш ойдан ортиқ вақт клубсиз қолганди. Фаолиятининг энг юқори чўққисида футболчи Transfermarkt портали томонидан 100 млн еврога баҳоланган эди.













