Англиянинг «Ливерпуль» клуби янги футболчиларни харид қилиш учун бир трансфер ойнасида сарфланган маблағ бўйича рекорд ўрнатди. Бу ҳақда статистик портал Transfermarkt маълумотларига асосланиб хабар берилди.
Манбага кўра, «Ливерпуль» ёзги трансферлар учун 483 млн евро сарфлади. Шу тариқа, мерсисайдликлар бу борадаги олдинги натижани янгилашди. Илгари бу рекорд «Челси»га тегишли бўлиб, улар 2023 йил ёзида янги футболчилар учун 464 млн евро тўлашган эди.
Эслатиб ўтамиз, жорий ёзда «Ливерпуль» рекорд даражада қиммат трансферларни амалга оширди: «Байер»дан ярим ҳимоячи Флориан Вирц учун 125 млн евро ва «Ньюкасл Юнайтед»дан швед ҳужумчиси Александер Исак учун 144 млн евро сарфлади.
Шунингдек, улар ҳужумчи Уго Экитикенининг трансферини 95 млн евро эвазига олишди. Ҳимоя чизиғига ҳам қатор харидлар амалга оширилди: Милош Керкез (46,9 млн евро), Жереми Фримпонг (40 млн евро ), Жованни Леони (31 млн евро), Армин Печи (1,78 млн евро).













