"ПСЖ" ҳужумчи Рандаль Коло-Муанининг такрорий ижарасининг бекор қилингани учун "Ювентус"дан ғазабланган.
26 ёшли француз ўтган мавсумнинг иккинчи ярмида ижара асосида Италия клуби учун ўйнаган эди.
Ёзда туринликлар Коло-Муанини қайтариб олиш учун бир неча уриниш қилишди. Дастлаб улар уни сотиб олиш имконияти ёки мажбурияти билан қайта ижарага олмоқчи бўлишди, кейинчалик эса ҳеч қандай шартларсиз шунчаки ижарага олишни хоҳлашди.
Натижада, трансфер ойнасининг сўнгги кунида "Юве" "Лейпциг"дан ҳужумчи Лои Опендани ижарага олишни афзал кўрди. Бундай қарор "ПСЖ" раҳбариятини ғазаблантирди, айниқса парижликлар туринликлар бош директори Дамьен Комоллидан норози бўлишди, деб хабар бермоқда Football Italia нашри.
"ПСЖ" шошилинч равишда Коло-Муанини "Тоттенхэм"га ижарага беришга мажбур бўлди.
Манбага кўра, музокаралар пайтида француз клуби ҳужумчини "Ювентус"га 60 миллион еврога мажбурий сотиб олиш шарти билан ижарага юборишни режалаштирган, Комолли эса туринликлар Чемпионлар лигасига чиққан тақдирда 30 миллион ва 10 миллион евро бонус эвазига сотиб олишни таклиф қилган.
