Мадриднинг "Реал" клуби марказий ҳимоячиси Давид Алаба "Бешиктош"ни қизиқтириб қолди. 33 ёшли футболчи жорий мавсумда ҳали майдонга тушмади ва унинг шартномаси келаси йилнинг ўрталарида якунланади. Defensa Central хабарига кўра, "Бешиктош" австриялик футболчини трансфер ойнасининг сўнгги кунларида таклиф қилиш имкониятини кўриб чиқмоқда - Туркияда трансфер ойнаси ҳали очиқ.
Давид Алаба "Реал" сафида 2021 йилдан буён тўп суриб келмоқда, бунгача у узоқ йиллар давомида "Бавария" шарафини ҳимоя қилган. Ўтган мавсум давомида футболчи жароҳатлар билан боғлиқ доимий муаммолар туфайли атиги 14 та ўйинда майдонга тушди. Transfermarkt портали мутахассислари тажрибали марказий ҳимоячининг нархини 6 млн еврога баҳоламоқда.













