Килиан Мбаппе Франция терма жамоасидаги голлари сони бўйича Тьерри Анрига етиб олди. Энди уларда 51 тадан гол бор. "Уч ранглилар" тўпурарлари рўйхатида фақат Оливье Жиру юқорироқ ўринни эгаллаб турибди, унинг ҳисобида терма жамоа сафида 57 та гол бор. Украина устидан қозонилган ғалабадан сўнг (2:0) Мбаппе ўз ютуғига изоҳ берди.

"Титига респект! Аммо энди Анрини ортда қолдиришни истайман!" - деди Мбаппе TF1’да кулиб.

"Тьерри Анридек футболчига етиб олиш мен учун катта шараф. Унинг биз, франциялик футболчилар, айниқса, ҳужумчилар учун қандай аҳамиятга эга эканини ҳамма билади. Мен уни жуда ҳурмат қиламан ва унга қойил қоламан. Бу маррага жуда эрта эришиш ақлга сиғмайди, лекин менга ёқади. Мен шу руҳда давом этишни ва биринчи навбатда ўйинларда ғалаба қозониб, унвонларни қўлга киритишни истайман.

Рекорд яқинлашмоқда, лекин мен бу ҳақда ўйламаяпман. Уни енга оламан деб ўйлаганим учунми ёки ундан ҳам муҳимроқ нарсалар борлиги учунми? Аммо ҳа, Франция терма жамоаси тарихидаги энг яхши тўпурар бўлиш - катта жасорат," - дейди Мбаппе.