С Серияда иштирок этаётган "Ювентус"нинг ёшлар жамоаси 3 йил ичида трансферлардан 200 миллион евро даромад келтирди. Бу ҳақда Football Italia нашри хабар бермоқда.
"Ювентус" А Серия клублари орасида биринчи бўлиб қуйи лигаларда ўйнайдиган жамоа тузди. "Ювентус U23" ўз фаолиятини 2018 йилда бошлаган ва 4 йилдан сўнг "Ювентус Next Gen" (инглизча next generation - "кейинги авлод" сўзидан қисқартирилган) деб ўзгартирилган.
Бу жамоадан бир қатор таниқли футболчилар, жумладан, ҳозирда "Реал"да ўйнаётган Дин Хёйсен, "Рома"га 30 миллион еврога тушган Матиас Соуле, 20 миллион эвазига "Милан" футболчисига айланган Кони Де Винтер каби футболчилар етишиб чиққан.
