Ўзбекистон кубогининг 1/4 финал «Пахтакор» ва «Гулистон» жамоаларт учрашувидан кейин «Гулистон» бош мураббийи Бахтиёр Ашурматов ўйин борасида ўз фикрларини айтиб ўтди.

«Яхши ўйин намойиш этмадик ва «Пахтакор»дан йирик ҳисобда енгилдик. Бунга бир неча сабаблар бор. Биринчи навбатда молиявий ҳолатимизнинг ўта ёмон эканлиги. Машғулотларни тўлақонли ўтказиб, баҳсларга яхши тайёргарлик кўра олмаяпмиз ҳам».

«Мавсум бошида Гулистон шаҳар ҳокимлиги бизга ёрдам кўрсатди, лекин уларнинг имкониятлари чекланган. Бош ҳомий эса ҳозирча ёрдам кўрсатмаяпти».

«Давралар оралиғида қаерда тайёргарлик қилишимиз номаълум. Жамоани бир неча футболчилар тарк этиши мумкин. Уларга бошқа клублардан таклифлар бор. Бундай ҳолатда мақсадимиз олий лигада ўрнимизни сақлаб қолиш бўлади. Шунинг ўзи бизга катта муваффақият саналади».

«7 нафар етакчи футболчимиз жароҳат туфайли майдонга туша олмаяпти. Ўз навбатида гулистонлик футбол ишқибозларидан охирги пайтлардаги салбий натижалар учун бутун жамоа номидан узр сўрайман. Лекин бундай ачинарли ҳолатда ижобий натижаларга умид қилиш қийин. Афтидан, Гулистонда футбол фақат мухлислар ва жамоада раҳбарлардан бири саналган Алишер Эргашевга керак холос, шекилли», дейди Ашурматов.