"Манчестер Юнайтед" клуби Европадаги мусобақаларда иштирок эта олмагани сабабли ўз тақвимидаги бўшлиқни тўлдириш учун ҳафта ўртасида бир қатор ўртоқлик учрашувларини ўтказиш бўйича музокаралар олиб бормоқда, деб хабар беради The Sun нашри.
Манбага кўра, "қизил иблислар" еврокубокларда иштирок этмаётган бошқа жамоалар билан бир нечта ўйин ташкил қилмоқчи. "МЮ"га "Милан", "Лацио", "Лейпциг" ва "Севилья" жамоалари рақиб бўлишлари мумкин.
Таъкидланишича, агар тегишли тўлов амалга оширилса, бу ўйинлар Англиядан ташқарида, масалан, БААда ўтказилиши мумкин.
Англия чемпионатининг сўнгги мавсуми якунига кўра "манкунианликлар" 15-ўринни эгаллашди.
