Халқаро танаффус «Барселона» учун йўқотиш олиб келди — жамоанинг марказий ярим ҳимоячиси Френки де Йонг жароҳат олди ва «Валенсия»га қарши учрашувни ўтказиб юборади. Бу эса Ханси Фликни марказда янги ечим излашга мажбур қилмоқда.

SPORT нашрининг ёзишича, бош мураббий синовдан ўтган Педри – Марк Касадо дуэтига ишонч билдириши кутилмоқда. Улар бирга асосий таркибда 36 марта майдонга тушиб, 27 та ғалаба, 3 та дуранг ва атиги 6 марта мағлубият қайд этган. Бу эса тахминан 75 фоизлик ғалаба кўрсаткичи ва 16,7 фоизлик мағлубиятлар улушини англатади.

Дуэтнинг устун жиҳатлари аниқ: Касадо ҳимояда ишончли ўйин кўрсатади, Педри эса олдинга ҳаракатланиш ва ижодий ўйин учун эркинлик олади. Бироқ де Йонгнинг йўқлиги жамоани вертикал узатмалар ва тезкор ҳужумлардан маҳрум қилади, шунинг учун Педрининг вазифалари янада ортиши мумкин.

Педрининг формаси ажойиб: у Ла Лиганинг дастлабки уч учрашувини тўлиқ ўтказди, ўртача ҳар ўйинда иккитадан ҳал қилувчи пас бермоқда ва бир йирик гол имкониятини яратмоқда.

Касадо ҳозирча чекланган ўйин дақиқлари олди — фақат «Леванте»га қарши ўйинни асосий таркибда бошлаб, таймлар орасида алмаштирилганди. Шунга қарамай, уларнинг умумий статистикаси мухлисларга ишонч бағишламоқда ва Флик ушбу дуэтдан яхши натижа кутади.