Френки де Йонг Чемпионлар лигаси доирасида "Ньюкасл"га қарши ўйинда майдонга тушиши мумкин.
Пайшанба куни Каталония клуби EЧЛ умумий босқич 1-тури доирасида "Ньюкасл" майдонига сафар қилади.
Аввалроқ, "блауграна" ярим ҳимоячиси Френки де Йонг Нидерландия терма жамоаси қароргоҳини тарк этгани маълум бўлганди. Футболчи 2026-йилги Жаҳон чемпионати саралашида Польшага қарши ўйинда (1:1) мушакларидаги ноқулайлик туфайли алмаштирилди.
Де Йонг Ла Лига 4-туридан ўрин олган "Валенсия"га (6:0) қарши ўйинни ўтказиб юборди.
Marca хабарига кўра, душанба куни Френки одатдагидан кўпроқ юклама олган футболчилар билан бир гуруҳда ишлади: "Валенсия"га қарши асосий таркибда майдонга тушган футболчилар тикланиш машқлари билан чекланди.
Агар тикланиш жараёни яхши ўтса, де Йонг "Ньюкасл"га қарши ўйин қайдномасидан ўрин олиши мумкин. "Барселона"да бу борада ижобий қарашлар сақланиб қолмоқда.
