Саудия Арабистонининг «Ал-Аҳли» клуби бош мураббийи Маттиас Яйссле жамоасини ОФК Элит Чемпионлар лигаси мусобақасининг 1-турида ғалаба қозонгани учун мақтади.

Германиялик мутахассис биринчи бўлимда жамоаси заиф ўйнаганини тан олди. Шу фурсатдан фойдаланган ўзбекистонлик Ҳусайн Норчаев «Насаф» сафида дубль қайд этди. Бироқ «Ал-Аҳли» иккинчи таймда жонланиб, 4:2 ҳисобида ғалаба қозонди.

«Учрашув қийин бўлди, — деди Яйссле. — Биринчи бўлимда биз ўйинга кириша олмадик ва икки гол ўтказдик. Лекин иккинчи бўлимда характеримизни кўрсатишимиз кераклигини англадик.

Жамоа ҳамжиҳатликда мухлислар учун ўйнаганини кўриш ёқимли бўлди. Футболчиларим гол ургандаги эҳтиросларини томоша қилишдан завқ олдим.

Албатта, ҳар қандай заиф ўйиннинг кўп сабаблари бўлади. Биз тезликнинг аҳамияти ҳақида кўп гаплашдик. Шу билан бирга, мухлисларнинг қўллаб-қувватлаши ғалабамизнинг энг муҳим сабабларидан бири бўлди».

Жума куни уларни "Ал-Аҳли"ни Суперлига доирасида «Ал-Ҳилол»га қарши муҳим баҳс кутмоқда. Бир ҳафтадан сўнг эса Мисрнинг «Пирамидс» клубига қарши ФИФА Интерконтинентал кубоги ўйини бор.

«Бугун ғалаба қозониш биз учун жуда муҳим эди, — деди Яйссле. — Жамоанинг камбэк қилиб, тўрт гол уриб ғалаба қозонганидан ғурурланаман. Бугун муҳим футболчиларни хавф остига қўйгим келмади. Шунинг учун таркибда ротацияда қўл урдим».