Ўзбекистон футбол ассоциацияси биринчи вице-президенти Равшан Ирматов Фарғона вилоятида бўлиб, футбол борасида амалга оширилаётган ишлар ва истиқболдаги ривожланиш йўналишлари билан танишди.
Фарғона вилояти ҳокими, вилоят футбол ассоциацияси президенти Хайрулла Бозоров билан биргаликда футбол инфратузилмаси, барча ёшдаги жамоаларга яратилган шароитлар, овқатланиш хоналари, мураббийлар таълими борасидаги ишлар ўрганилди. Вилоят футбол академияси, футбол мактаблари фаолияти ва самарадорлиги таҳлил қилинди, келгусидаги режалар муҳокама қилинди. Уларга ЎФА томонидан футбол тўплари тақдим этилди.
Болалар ва ўсмирлар футболи оммавийлиги ва қамровини янада кенгайтириш мақсадида ЎФА ҳамда Фарғона вилояти ҳокимлиги билан биргаликда барпо этиладиган учта янги майдон лойиҳаси билан танишилди.













