"Арсенал" футболчиси Леандро Троссард яна захирадан майдонга тушиб, ўз ҳисобига гол ёздириб қўйди. Чемпионлар лигаси доирасида "Атлетик" Бильбаога қарши сафар ўйинида Микель Артета бельгиялик футболчини 65-дақиқада майдонга туширди. 72-дақиқада вингер ҳисобни очган Габриэл Мартинеллининг голига ассистентлик қилган бўлса, 87-дақиқада ўзи гол уриб, "канонирлар"нинг ғалабасини мустаҳкамлади - 2:0.

Opta хабарига кўра, Троссар 2023 йил бошида клубга келганидан бери захирадан майдонга тушган ҳолда "Арсенал"нинг 14 та голида (10+4) бевосита иштирок этган - бу кўрсатилган даврда АПЛнинг барча вакиллари орасида энг яхши кўрсаткичдир.

Лондонликлар 21 сентябрь, якшанба куни Англия чемпионати доирасида "Манчестер Сити" меҳмони бўлади.