"Ювентус" марказий ҳимоячиси Ллойд Келли ёзги трансферлар даврида Англиянинг "Сандерленд" клубига кўчиб ўтиши мумкин эди. Бу ҳақда инсайдер Никола Скира маълум қилди.
Манбага кўра, август ойида "Ювентус" "Сандерленд"нинг 20 миллион евролик таклифини рад этган. Таъкидланишича, Келлининг ўзи ҳам Туринда қолишни истаган. Қолаверса, жамоа бош мураббийи Игор Тудор Келлини қадрлайди, шу боис уни таркибда олиб қолмоқчилигини очиқ айтган.
Жорий мавсумда 26 ёшли Келли барча мусобақаларда 4 та ўйинда майдонга тушди ва 2 та гол урди. Футболчининг "кекса сеньора" билан шартномаси 2029 йилгача мўлжалланган.
