"Реал" Дин Хёйсеннинг қизил карточкаси бўйича эътироз билдиришда давом этади.
Мадридликлар ҳимоячиси "Реал Сосьедад"га (2:1) қарши ўйиннинг 32-дақиқасида майдон марказида рақибнинг қарши ҳужуми барбод бўлиши натижасида қизил карточка олди. Учрашув бош ҳаками Хесус Хил Мансано эди.
Испания Қироллик футбол федерацияси (RFEF) Тартиб-интизом қўмитаси кеча "қаймоқранглилар"нинг дастлабки апелляциясини рад этди.
Бугун маълум бўлишича, RFEF апелляция қўмитаси футболчининг дисквалификацияси ҳақидаги қарорни ўз кучида қолдирган. Шу тариқа, 20 ёшли футболчи 20 сентябрь куни "Эспаньол"га қарши ўйинни ўтказиб юборади.
Бироқ, COPE хабарига кўра, мадридликлар Хёйсен иши бўйича яна бир апелляция беради. Улар Испания спорт маъмурий судига (TAD) мурожаат қилишлари кутилмоқда.
