Мадриднинг «Реал» клуби ҳужумчиси Килиан Мбаппенинг Испания Ла Лигаси 5-туридан ўрин олган «Эспаньол»га қарши учрашувдаги (2:0) голи унинг мусобақадаги 36-та голи бўлди. Шу кўрсаткич билан 26 ёшли футболчи Испания чемпионатида 35 гол урган «Барселона»нинг собиқ ҳужумчиси Тьерри Анридан ўтиб кетди.
Шу тариқа, Мбаппе Ла Лигада 39 учрашувда 36 гол урди. Анри эса рақиблар дарвозасини 80 ўйинда 35 марта ишғол қилган.
Мбаппе «Қироллик клуби»га 2024 йил ёзида қўшилган. Шу давр мобайнида у «Реал» сафида барча мусобақаларда 51 гол урди. Анри эса «кўк-анорранглилар» таркибида 2007–2010 йилларда тўп суриб, барча турнирларда 49 гол билан қайд этилган.













