"Барселона" клуби ўзининг расмий сайтида ярим ҳимоячи Гавининг ҳолати ҳақида баёнот берди.
21 ёшли Гави ўнг тиззасининг ички мениск жароҳати бўйича консерватив даволанишни тугатгандан сўнг, интенсив стресс тестларидан ўтди.
"Энг яхши тикланишни таъминлаш учун Гави сешанба куни клубнинг тиббий штаби назорати остида доктор Жоан Карлес Монльяу томонидан артроскопик текширувдан ўтказилади," - дейилади баёнотда.
Жараён якунлангач, "Барселона" алоҳида пресс-релиз эълон қилишга ваъда берди.
Гави охирги марта "Барселона"да деярли бир ой олдин - 23 август куни ўйнаган эди.
