Суперлига 23-туридан ўрин олган "Машъал" — "Бухоро" (0:0) учрашувидан сўнг "Бухоро" бош мураббийи Александр Хомяков матбуот анжуманида иштирок этди.

— Ўйин ҳақида фикрингиз?

— Бугун олти очколик ўйин бўлди. Буни ҳамма тушуниб турганди. Чунки иккала жамоа ҳам бир мақсад йўлида, яъни Суперлигада қолиш учун кураш олиб боряпти. Ўйинда устунлик кўпроқ "Машъал" томонида бўлди. Биз эса ўзимизни кўрсата олмадик. Бунинг устига биринчи таймда футболчимиз қизил карточка олди ва вазият биз учун янада оғирлашди. Шунга қарамай охиригача кураш олиб борган футболчиларга ўз раҳматимни айтаман. Биз қўлни туширмадик ва сафарда бир очко қўлга киритдик. Тўғри, ютишни хоҳлагандик, лекин учрашувдаги кўп вазиятлардан келиб чиққан ҳолда дуранг ёмон эмас деб ўйлайман.

— Захирадан футболчиларни тушириш орқали нимага кўпроқ урғу бердингиз?

— Бундай пайтда ўйинга қўшилиб кетиш қийин бўлади. Шу боис захирадан тушганлар бирданига ўйинни кучайтириб юборди дея олмайман. Муҳими, баҳс темпини туширмасдан бир текис тугатиб қўйдик.

— Қизил карточка ҳақида фикрингиз?

— Эпизодни қайта кўришимиз керак. Ўйиндаги ҳолатлардан бири рўй берди, футболчимиз тирсаги билан урдими-йўқми, билмайман. Ҳакам эса қарор қабул қилди.

— Жамоангиз "Сўғдиёна" ва "Навбаҳор"ни мағлуб этди, аммо "Машъал"ни енга олмади.

— Шуни айтишим мумкин, бизга эмоция етишмади. Характер кўрсата олдик, лекин ютиш учун кучли иштиёқ ҳам керак. Кубок ярим финалидан сўнг орадан тўрт кун ўтди ва бу вақт оралиғида ҳеч қанақа тактика ишлаб чиқа олмайсан. Бундай паллада иштиёқ кўп нарсани ҳал қилади. Бугун "Машъал" жамоаси бизга нисбатан тетик эди. Чунки муборакликлар бир ҳафтадан кўпроқ дам олишди. Бизга эса тетиклик етишмади.