Машҳур собиқ ҳужумчи Давид Вилья "Барселона" футболчиси Ферран Торрес ҳақида қандай фикрда эканини айтди.

"Кўк-анорранглилар" ҳужумчиси 25 ёшида Испания терма жамоаси сафида 50 та ўйинда майдонга тушиб, 22 та гол уришга улгурган. Рекорд ҳамон Вильяга тегишли - 59 гол.

"Умид қиламанки, Ферран Испания терма жамоасидаги голлар сони бўйича менинг рекордимни янгилайди. Мен жуда хурсанд бўламан. Уни ажойиб футболчи ва ажойиб инсон деб ҳисоблайман," - деди жаҳон ва Европа чемпиони DAZN телеканали эфирида.

Чоршанба куни Чемпионлар лигаси доирасидаги ўйинда Ферран Торрес "ПСЖ" дарвозасини ишғол қилди, аммо "Барселона" барибир мағлуб бўлди (1:2).

11 ва 14 октябрь кунлари Испания терма жамоаси ЖЧ-2026 саралаш босқичи доирасида Грузия ва Болгарияга қарши баҳс олиб боради.