Жума куни "Барселона" Ламин Ямалнинг белидаги муаммо туфайли икки-уч ҳафта майдонга туша олмаслигини эълон қилди. Marca нашри тарқатган хабарга кўра "кўк-анорранглилар"нинг ушбу баёнотидан кейин Испания терма жамоаси ҳайрон бўлмоқда.

Манбага кўра, "Барселона" пайшанба куни Испания Қироллик футбол федерацияси билан алоқада бўлган. Клуб Ямалда чарчоқ ва ноқулайлик борлиги ҳақида хабар берган, аммо футболчи яқинлашиб келаётган ўйинда майдонга туша олмаслиги ҳақида ҳеч нарса маълум қилмаган. Айнан шунинг учун ҳам Ламин Испания терма жамоасига чақирилган футболчилар рўйхатига киритилди. Рўйхат "Барселона" Ямал ҳақида хабар эълон қилишидан бир неча соат олдин эълон қилинди.

Ўтган ойда Ламин Ямал Испания терма жамоасидаги ўйинларидан сўнг лазаретга тушиб қолган эди. "Барселона" бош мураббийи Ханс-Дитер Флик футболчининг муаммоларини билган ҳолда ундан терма жамоада фойдаланишганидан ғазабланди.