«Барселона» ҳужумчиси Рафинья ва ҳужумкор яримҳимоячи Фермин Лопес жароҳатларидан тузалиб, Испания чемпионати 9-туридан ўрин олган «Жирона»га қарши баҳсга тайёр бўлишади.
Ушбу учрашув ФИФА кунларидан сўнг, 18 октябрь куни бўлиб ўтади. Бу ҳақда AS нашри журналисти Хави Мигель ўзининг X ижтимоий тармоғида хабар берди.
Манбага кўра, «кўк-анорранглилар» дарвозабони Жоан Гарсия ҳам машғулотларни давом эттирмоқда ва 26 октябрь куни «Реал»га қарши баҳсда майдонга қайтишни мақсад қилган.
Эслатиб ўтамиз, сентябрь ойи охирида Рафинья оёғининг ўнг сон қисмидаги пайини жароҳатлаганини маълум қилган эди. Фермин Лопес эса ўтган ой охирида мушак жароҳати олганди.













