Мадриднинг "Атлетико" клуби бош мураббийи Диего Симеоне Ла Лиганинг 8-туридан ўрин олган "Сельта"га қарши ўйин натижасидан нега қониқиш ҳосил қилганига изоҳ берди.

40-дақиқадан бошлаб мадридликлар иккита сариқ карточка олган Клеман Лангленинг четлатилишидан кейин бир киши кам бўлиб ўйнашди.

"60 дақиқа давомида бир киши кам бўлиб ўйнадик ва барча футболчилар қаттиқ ҳаракат қилишди, шунинг учун жуда хурсандман. Мен ҳар доим ижобийликка эътибор қаратаман. Ижобий томони шундаки, четлатилиш туфайли қийин вазиятга тушиб қолган жамоа бунга муносиб жавоб қайтарди," - дея аргентиналик мутахассиснинг сўзларини келтиради клуб матбуот хизмати.

Учрашув 1:1 ҳисобида якунланди. "Атлетико" 7-дақиқада Карль Старфельтнинг автоголи эвазига ҳисобда олдинга чиқиб олганди. "Сельта" 68-дақиқада жавоб тўпини киритди.

8 турдан сўнг Симеоне жамоаси 13 очко билан турнир жадвалида еттинчи ўринда бормоқда.