“Ньюкасл”нинг собиқ ҳужумчиси Алан Ширер “Манчестер Сити” форварди Эрлинг Холанд билан бўлаётган таққослашларга изоҳ берди. Норвегиялик ҳужумчи 104 та ўйинда 94 та гол урган. Ширер Холанднинг тезлиги ва жисмоний кучига алоҳида тўхталиб ўтди.

«Сўнгги пайтларда Премьер-лига тарихидаги энг яхши ҳужумчи ким — менми ёки Холандми, деган гаплар кўпайди. Буни одамлар ўзи ҳал қилаверсин. Мен ўз фаолиятимдан жуда мамнунман.

Эрлинг ҳақида айтсам — у мутлақо "вахший"! Унинг ўйини менга жуда ёқади ва унга нисбатан катта ҳурматим бор. Унинг деярли ҳеч қандай заиф томони йўқ: тез, бақувват, бош билан аъло даражада ўйнайди ва жуда кўп гол уради. У бундан ташқари, унга имконият яратиб берадиган ажойиб жамоа сафида ўйнайди. Шунинг учун баҳслар давом этсин», — деди Ширер.

Алан Ширер АПЛ тарихидаги энг яхши тўпурар ҳисобланади — у 441 та ўйинда 260 та гол урган.