Аргентинанинг “Бока Хуниорс” клуби бош мураббийи Мигель Анхел Руссо 69 ёшида вафот этди. Бу ҳақда клуб расмий сайти хабар берди.

Мураббий 2025 йил сентябрь ойида сийдик йўлларидаги инфекцион касаллик сабабли касалхонага ётқизилган эди. Шифохонада унинг аҳволи оғирлашди.

“У сўнгги кунигача футболдаги буюк иштиёқига содиқ бўлиб қолди. Унинг ёрдамчиси Клаудио Убеда берган маълумотларга кўра, у касалхонада ётган вақтида ҳам жамоа билан боғлиқ барча жараёнлардан хабардор бўлган. У ишига фидокорлик билан ёндашган, ўз ҳаёти давомида футболчи сифатида ҳам, мураббий сифатида ҳам ҳақиқий курашчи бўлиб қолган”, дейилади клуб баёнотида.

Руссо футболчилик фаолиятининг барчасини “Эстудиантес” клубида ўтказган. 1989-йилдан бошлаб мураббийлик фаолиятини бошлаган ва шу вақт давомида “Ланус”, “Велес Сарсфилд”, “Сан-Лоренсо”, “Ан-Насср”, “Миллонариос”, “Эстудиантес” ва “Бока Хуниорс” каби клубларда ишлаган.

У “Бока Хуниорс” клубини 2007-йилда, кейин 2020–2021-йилларда ва яна 2025-йилда бошқарган. 2007-йилда Руссо “Бока” билан Либертадорес Кубогини қўлга киритган эди.