Мадриднинг "Реал" клуби дарвозабони Тибо Куртуа клуб билан амалдаги келишувни узайтирмоқчи эмас, дея хабар бермоқда El Nacional.
Бельгияликнинг шартномаси 2027 йилгача мўлжалланган. Манба маълумотига кўра, Куртуа шартномасини якунлагач, профессионал фаолиятини якунлаши ёки сўнгги йирик келишувни имзолаши мумкин - эҳтимол, Саудия Арабистони клубларидан бири билан. Шунингдек, у футболчилик фаолиятини бошлаган "Генк"га қайтиш варианти ҳам кўриб чиқилмоқда.
Қайд этилишича, "Реал" президенти Флорентино Перес Куртуа кетганидан кейин биринчи рақамли позиция учун асосий номзод сифатида украиналик Андрей Лунинни кўрмоқда. Аммо бунинг учун Лунин бельгиялик футболчининг шартномаси якунига қадар захирада қолиши керак ва бу имкониятни кутишга унинг сабр-тоқати етадими ёки йўқми, номаълум.
Мадридликлар учун муқобил вариант - "Брайтон" аъзоси Барт Вербрюгген. Клуб скаут хизмати аллақачон нидерландиялик посбоннинг ўйинини диққат билан кузатиб бормоқда.
Жорий мавсумда 26 ёшли Лунин ҳали "Реал" сафида майдонга тушмаган. Тибо Куртуа айни дамда 33 ёшда.
