"Интер Майами" ҳужумчиси Лионель Месси Аргентина терма жамоасида ўзига хос натижа қайд этди.
38 ёшли футболчи бугун бўлиб ўтган Пуэрто-Рикога қарши ўртоқлик ўйинининг 23-дақиқасида Гонсало Монтиэлга ассистентлик қилди. Эндиликда Месси терма жамоа сафида 59 та голли узатмани амалга оширди - бу терма жамоалар даражасидаги барча даврлар учун жаҳон рекорди ҳисобланади. Кейинги ўринларда 58 тадан ассист амалга оширган Лендон Донован (АҚШ) ва Неймар (Бразилия) бормоқда.
Лионель Месси "альбиселесте" сафида узоқ 2005 йилдан буён тўп тепиб келмоқда. Умуман олганда, ҳужумчи Аргентина терма жамоаси сафида 195 та ўйин ўтказиб, 114 та гол урган.
Аввалроқ, унинг азалий рақиби Роналду ЖЧ саралашлари тарихидаги энг яхши тўпурарга айланиб олган эди.
