Польша терма жамоаси бош мураббийи Ян Урбан миллий жамоа ҳужумчиси Роберт Левандовскининг жароҳати ҳақида фикр билдирди. Аввалроқ «Барселона» расмий баёнот чиқариб, форварднинг чап сон орқа қисмидаги мушак жароҳати олганини маълум қилган эди.

«Менинг назаримда, агар фибрилляр боғлама узилган бўлса, бу тез югуришга йўл қўймайди, ўйнашнинг иложи бўлмайди. Ва футбол билан боғлиқ бўлган ҳар бир инсон бундан хабардор. Шу боис мен буни тушунмайман.

Ҳа, у ҳақиқатдан ҳам бироз ноқулайликни ҳис қилди, биз шифокор ва Роберт билан келишиб олган эдик: агар у қандайдир дискомфорт сезса, ўзини алмаштиришни сўрайди. Лекин у ўйинни муаммосиз охиригача ўтказди. Йўқ, менда ҳеч қандай шубҳа йўқ. Левандовски аъло ҳолатда эди ва Янги Зеландияга қарши ўйнамади, чунки биз бошқа футболчиларга имконият беришни хохладик.

Мен унинг аввалги жароҳатидан қолган излар ёки кичик тортилган жой бўлиши мумкин деб ўйлаган эдим. Лекин мен ўзим ҳам футболчи бўлганман — мушак жароҳати олганлар дарҳол тўхтаб, ўйинни давом эттира олмаслигини кўп марта кўрганман. Афсус, лекин бу қандай жароҳат эканини ҳали ҳам тушунмайман. Ўйинлар жуда кўп бўлган пайтда, бундай ҳолатда хавфга бориш шарт эмас», — дея Ян Урбаннинг сўзларини Mundo Deportivo келтиради.