Мавсумолди йиғинидан бери ўйинларда қатнашмаётган «Наполи» форварди Ромелу Лукаку 18 декабрь куни майдонга қайтиши мумкин. Шу санада унинг «Милан»га қарши Италия Суперкубоги ярим финалида иштирок этиши режалаштирилган. Бу ҳақда La Gazzetta dello Sport хабар берди.
Эслатиб ўтамиз, бельгиялик ҳужумчи 14 август куни «Олимпиакос»га қарши ўтказилган ўртоқлик учрашувида чап сон мушакларида жиддий жароҳат олган эди.
«Наполи»нинг тиббий штаби футболчининг тикланиш жараёнини шоширмасликка қарор қилган. Илгари Лукаку ноябрь ойи охирида қайтиши мумкинлиги айтилган бўлса-да, клуб эҳтиёткорлик билан йўл тутишни маъқул кўрган.
Ромелу Лукаку 2024 йилдан буён «Наполи» шарафини ҳимоя қилиб келмоқда. Унинг клуб билан тузган шартномаси 2027 йилгача амал қилади.













