"Манчестер Юнайтед" бош мураббийи Рубен Аморим ярим ҳимоячи Кобби Майну ва ҳужумчи Жошуа Зиркзее тез орада клубни тарк этиши ҳақидаги миш-мишларга муносабат билдирди.
"Қизил иблислар" бош мураббийининг сўзларига кўра, англиялик ва нидерландиялик январда ҳам жамоада қолади.
"Улар бизнинг футболчиларимиз ва иккаласи ҳам мавсумни яхши ўтказиши керак. "Манчестер Юнайтед" атрофида доим шов-шув кўплигини биламан. Баъзи футболчилар ўйнамайди, шу билан бирга ҳамма мунтазам майдонга тушишни хоҳлайди - боз устига 2026 йилда жаҳон чемпионати бўлиб ўтади. Агентлар футболчиларни тинглаб, улар билан тинимсиз суҳбатлашмоқда," - дея Аморимнинг сўзларини келтиради Utd Report.
Кобби Майну жорий мавсумда олтита ўйинда иштирок этди, Жошуа Зиркзее эса бор-йўғи тўрт марта майдонга тушди.
