"Тоттенхэм" форварди Матис Тель Мюнхеннинг "Бавария" клуби ҳужумчиси Харри Кейн ҳақида фикр билдирди.

Французнинг айтишича, немис клуби етакчиси унга ҳужум чизиғида ўйнаш бўйича маслаҳатлари билан тез-тез ёрдам бериб туради.

"У мен билан суҳбатлашишга вақт ажратади. У менга қандай қилиб яхшироқ бўлишим мумкинлигини тушунтиради. Мен учун у дунёнинг энг яхши ҳужумчиси, у 13 та ўйин ўтказиб, 21 та гол урган. У жуда яхши йигит," - дея Телнинг сўзларини келтиради Bayern & Germany.

Кейн 2023 йилнинг ёзида "Бавария" футболчисига айланди. Мюнхенликлар либосида инглиз барча турнирларда 107 та ўйин ўтказиб, 104 та гол ва 29 та голли узатмани ўз ҳисобига ёздириб қўйган.