Футзал бўйича Ўзбекистон ўсмирлар терма жамоаси 22–31 октябрь кунлари Баҳрайнда бўлиб ўтадиган III Осиё ёшлар ўйинларида иштирок этади. BMB HOLDING делегациясининг Европа мамлакатлари бўйлаб ишчи сафаридан олдин Ўзбекистон футзал федерацияси президенти Бекзод Мамақулов жамоа аъзолари билан учрашиб, уларга самимий тилакларини билдирди.
ЎФФ раҳбари учрашув давомида мазкур мусобақа 2026 йилда Сенегалда бўлиб ўтадиган Ёшлар Олимпиадасига саралаш вазифасини ўташини таъкидлади ва футболчилардан кучли учликка кириб, йўлланма олишни мақсад қилишларини сўради.
Терма жамоа бош мураббийи Дилшод Раҳматов жамоа мусобақага тўлиқ тайёр эканини маълум қилди. Жамоа сардори Абдулборий Ильясов ва бош шифокор Лазизбек Тешабеков футболчиларнинг жисмонан соғлом ва руҳан шай эканини таъкидлаб, ишонч учун миннатдорлик билдиришди.
Йиғилиш якунида ЎФФ раҳбарияти Ўзбекистон ўсмирлар терма жамоасига III Осиё ўйинларида омад ёр бўлишини тилаб, оқ фотиҳа берди.













