Мадриднинг «Реал» клуби Ла Лига томонидан 17-тур доирасидаги «Вильярреал» — «Барселона» учрашувини АҚШда ўтказмаслик ҳақида қабул қилинган қарордан мамнун. Бу ҳақда COPE хабар берди.

Эслатиб ўтамиз, беллашув 2025 йил 20 декабрь куни Майами шаҳрида бўлиб ўтиши режалаштирилган эди.

Манба маълумотларига кўра, «қироллик клуби» раҳбарияти бундай турдаги ўйинни ташкил этиш Испания чемпионати учун жиддий прецедент бўлиши мумкин, деб ҳисоблаган.

«Реал» вакиллари фикрича, Примера жамоалари футболчилари томонидан билдирилган норозилик ва Ла Лига раҳбариятининг ушбу ҳолатни яширишга уриниши учрашувни Майамида ўтказишдан воз кечишга ҳал қилувчи таъсир кўрсатган.

Аввалроқ 9-тур учрашувларида Ла Лига жамоалари ҳакамнинг ўйинни бошлаш ҳақидаги ҳуштагидан сўнг бир неча сония ҳаракатсиз туриб, мамлакат ташқарисида ўйин ўтказиш режасига нисбатан норозилик билдиришган эди. Шунингдек, «Овьедо» — «Эспаньол» ўйини трансляциясида мазкур акция эфирга узатилмаган.