Ҳанс-Дитер Фликнинг дисквалификацияси бекор қилинмади.
"Барселона" бош мураббийи "Жирона"га (2:1) қарши ўйинда ҳакамлар қароридан норози бўлгани учун иккита сариқ карточка олган эди. Клуб германиялик мутахассиснинг дисквалификацияси устидан шикоят қилишга уриниб кўрди.
Испания қироллик футбол федерацияси (RFEF) тартиб-интизом қўмитаси каталонияликларнинг апелляциясини рад этди.
"Ушбу апелляцияга сабаб бўлган иккита сариқ карточкани бекор қилиш тўғрисидаги илтимоснома рад этилди ва шу муносабат билан жаноб Ханс-Дитер Фликнинг четлатилишидан келиб чиқадиган бир ўйинга дисквалификация тарзидаги интизомий оқибатлар ўз кучида қолиши керак", - дейилади қўмита баёнотида.
Шу тариқа, Флик 26 октябрь куни бўлиб ўтадиган "Реал"га қарши ўйинни ўтказиб юборади.
