Суперлига 26-туридан ўрин олган «Бухоро» — «Сўғдиёна» (2:0) учрашувидан сўнг «Сўғдиёна» бош мураббийи Иван Бошкович матбуот анжуманида иштирок этди.

— Ўйин ҳақида фикрингиз?

— Жуда кучсиз ўйин намойиш этдик, айниқса биринчи таймда. Ҳаводаги курашларда ютқаздик, майдон марказини ҳам бой бердик. Рақиб узун тўп узатишлар орқали учинчи зонага тез кириб келди, биз эса улгурмай қолдик. Иккинчи таймда ҳартугул сифатли футбол намойиш этдик, лекин гол уриш учун етарли бўлмади. Аммо биринчи таймда ҳимоядаги ўйинимиз умуман ўхшамади.

— «Бухоро» билан Кубок ўйинида кўргандикки, Жасур Жалолиддинов майдонга тушганидан сўнг жамоангиз ўйини анча очилганди. Ўшанда «Сўғдиёна» иккита гол урганди. Бугун Жалолиддинов ўйнамади. «Сўғдиёна»нинг ўйини Жасурга боғланиб қолганми?

— Ўтган гал фақат Дориев ўйнаяпти деб айтилди, ҳозир эса фақат Жасур ўйнайди дейиляпти. «Сўғдиёна» жамоавий ўйин кўрсатади, биз алоҳида битта футболчига боғланиб қолган эмасмиз. Бугун кўп ўйинчиларимиз майдонда кўринмади, буни эса таҳлил қилиб чиқамиз. Жиззахдаги фаолиятим давомида биринчи марта қўл остимдаги жамоа бундай ёмон ўйинни ўтказди. Буни таҳлил қилмасак бўлмайди. Шахсан мен учун бу аламли мағлубият. Уч йил ичида энг кучсиз ўйинимиз шу бўлди. Рақиб жамоани ғалаба билан табриклайман.«Бухоро» ҳар ўйинни шундай ўтказса, ўз майдонида исталган рақибни мағлуб эта олади. Биз агрессив футбол кўрсатишимиз керак эди, аммо ҳеч нарса ўхшамади.

— Мутахассис сифатида Кубок финалида қандай натижа кутяпсиз?

— Финал ўз номи билан финал. Бунда савия жиҳатдан кучсиз кўринган жамоа ҳам яхши ўйнаб ютиб қўйиши мумкин. Чунки финал битта ўйиндан иборат ва эътибор ҳам шунга яраша бўлади. «Бухоро» — курашувчан жамоа, Кубок финалида ҳам жиддий курашса керак. Мен омад тилайман.