Лондоннинг “Арсенал” жамоасининг собиқ бош мураббийи, ҳозирда ФИФАнинг техник тадқиқот гуруҳи раҳбари сифатида фаолият юритаётган Арсен Венгер жамоанинг жорий мавсумдаги имкониятлари ҳақида фикр билдирди. Айни вақтда “канонирлар” Англия премьер-лигаси жадвалида пешқадамлик қилмоқда.

— “Арсенал” мавсум охирида чемпион бўладими? Албатта, шубҳасиз. Мен ҳар йили шундай дейишим мумкин, деб айтишингиз мумкин, аммо бу мавсумда улар етарлича кучли жамоа бўлиб, ҳар қандай қийинчиликка бардош бера олади, — деди Венгер.

— Ўтган мавсумда улар Кай Ҳаверц ва Букайо Сакани йўқотганида бу жуда сезиларли бўлган эди. Аммо энди жамоада Нони Мадуэке, Эберечи Эзе, Габриэл Мартинелли ва Леандро Троссард бор. Ҳимояда Кристиан Москера ўйнаяпти, қанотлар ва марказда ротация имкониятлари кўп. Майлз Льюис-Скелли ҳозирча жамоага тўлиқ мослаша олмаяпти, аммо у Англия терма жамоаси аъзоси, — деди афсонавий мураббий.