Лондоннинг “Челси” клуби “Бавария” марказий ҳимоячиси Дайот Упамекано трансфери учун курашга қўшилди. Бу ҳақда TeamTALK нашри хабар берди. Манбага кўра, франциялик футболчига “Ливерпуль”, “Интер” ва Мадриднинг “Реал” клублари ҳам қизиқиш билдирмоқда.

Мюнхенликлар 26 ёшли ҳимоячининг трансфер нархини 60 миллион евро атрофида баҳоламоқда. Шунга қарамай, Упамеканонинг “Бавария” билан амалдаги шартномаси 2026 йил ёзигача мўлжалланган. Агар клуб футболчи билан янги битим тузишга улгура олмаса, уни кейинги йил текинга қўлдан бой бериши мумкин.

“Челси” трансфер рўйхатида Упамеканодан ташқари “Кристал Пэлас” ҳимоячиси Марк Гехи, “Ноттингем Форест” футболчиси Мурильо ва “Бенфика” вакили Томас Араухо ҳам бор. Лондон клуби ёзда Йоррел Хатони харид қилган бўлса-да, Трево Чалоба ва Аксел Дисаси ўрнини тўлдириш учун яна бир марказий ҳимоячи изламоқда.

Маълумот учун, Дайот Упамекано жорий мавсумда “Бавария” сафида 16 та ўйинда майдонга тушиб, битта голли узатма муаллифи бўлди. Transfermarkt портали футболчининг бозор қийматини 60 миллион еврога баҳолаган.