Londonning “Chelsi” klubi “Bavariya” markaziy himoyachisi Dayot Upamekano transferi uchun kurashga qo‘shildi. Bu haqda TeamTALK nashri xabar berdi. Manbaga ko‘ra, fransiyalik futbolchiga “Liverpul”, “Inter” va Madridning “Real” klublari ham qiziqish bildirmoqda.

Myunxenliklar 26 yoshli himoyachining transfer narxini 60 million yevro atrofida baholamoqda. Shunga qaramay, Upamekanoning “Bavariya” bilan amaldagi shartnomasi 2026 yil yozigacha mo‘ljallangan. Agar klub futbolchi bilan yangi bitim tuzishga ulgura olmasa, uni keyingi yil tekinga qo‘ldan boy berishi mumkin.

“Chelsi” transfer ro‘yxatida Upamekanodan tashqari “Kristal Pelas” himoyachisi Mark Gexi, “Nottingem Forest” futbolchisi Murilyo va “Benfika” vakili Tomas Arauxo ham bor. London klubi yozda Yorrel Xatoni xarid qilgan bo‘lsa-da, Trevo Chaloba va Aksel Disasi o‘rnini to‘ldirish uchun yana bir markaziy himoyachi izlamoqda.

Ma’lumot uchun, Dayot Upamekano joriy mavsumda “Bavariya” safida 16 ta o‘yinda maydonga tushib, bitta golli uzatma muallifi bo‘ldi. Transfermarkt portali futbolchining bozor qiymatini 60 million yevroga baholagan.