"Реал" ҳужумчиси Килиан Мбаппе "Барселона" дарвозасига яна гол киритди. Франциялик футболчи якшанба кунги "эл-класико"нинг 22-дақиқасида ҳисобни очди ва ўйин 2:1 ҳисобида якунланди. Иккинчи бўлим бошида ҳужумчи дублга эришиши мумкин эди, бироқ пенальтини аниқ амалга ошира олмади.

Мбаппенинг ҳисобида бутун фаолияти давомида "Барселона" дарвозасига урилган 12 та гол мавжуд ва бу натижага эришиш учун атиги тўққизта ўйин кифоя бўлди. "ПСЖ"нинг собиқ футболчиси худди шу 12 та голни "Дижон", "Метц" ва "Марсель"га урган, "Лион" (13) ва "Монпелье" (15) эса улардан ҳам кўпроқ Мбаппедан жабр кўрган. Шундай қилиб, "Барса" Килианнинг француз бўлмаган жамоалар орасидаги "севимли" рақибига айланди.

Мбаппе Ла Лиганинг жорий мавсумида 11 та гол билан тўпурарлар пойгасида ишончли тарзда пешқадамлик қилмоқда.