Испаниядаги медиа-футбол турнири Kings League подкасти бошловчиси Ибай Льянос «Реал» ва «Барселона» (2:1) ўртасидаги «эл-класико»да юз берган можаро учун масъулиятни ўз зиммасига олди.

«Ямалнинг сўзлари туфайли юзага келган «эл-класико» ва бутун дунёдаги шов-шувда қисман менинг айбим бор. Стримда биз «Реал» ёки «Барса» ҳақида гаплашмоқчи эмасдик, шунчаки кўнгилочар эфир қилишни хоҳлагандик. Бир пайт Ламин “Мадрид алдов билан ўйнайди” деди.

Бу хабар “Реал”нинг кийиниш хонасигача етиб борди. Мадридликларнинг “сўзлар” ҳақида айтган гаплари айнан бизнинг стримга ишора эканини англаш учун инсон ўта ақлли бўлиши шарт эмас. У эфир фақат мен медиалига ўйинини бошқа санага кўчиришни сўраганим учун бўлган. Бу аҳмоқона кўринганди, лекин натижада полиция «эл-класико»га аралашишигача бориб етди», — деди Льянос ижтимоий тармоқлардаги видео мурожаатида.

Учрашувнинг якунига бир неча сония қолганда жамоалар захира скамейкалари яқинида тортишув юз берди. Финал ҳуштагидан кейин майдондаги футболчилар ҳам тортишувга қўшилди. «Реал» ўйинчилари «Барселона» вингери Ламин Ямаль томон хос ишора қилиб, ундан сукут сақлашни талаб қилишди.