Лондоннинг "Арсенал" клуби бош мураббийи Микель Артета Англия Лига кубоги доирасидаги "Брайтон"га (2:0) қарши ўйиндан сўнг ўз таассуротлари билан ўртоқлашди.
"Канонирлар" иккинчи бўлимда Итан Нванери ва Букайо Саканинг голлари эвазига 1/4 финал йўлланмасини қўлга киритди. Лондон грандининг ғалабали серияси саккизта ўйингача давом этди.
"Алоҳида кеча, хурсанд бўлиш учун сабаблар кўп. Кучли рақибни мағлуб этиб, чорак финалга чиқдик, таркибда эса ўнта ўзгариш қилдик - ҳеч қачон бирга ўйнамаган футболчилар майдонга тушди. Ҳаммаси иложи борича яхши бўлди. Ёш футболчиларнинг ўзини кўрсатиши ҳар доим ёқимли", - деди Артета Sky Sports’га берган интервьюсида.
Лига кубогининг 1/4 финалида "Арсенал" "Кристал Пэлас"га қарши баҳс олиб боради.
