Қатарнинг «Ал-Дуҳайл» жамоаси ярим ҳимоячиси Марко Верратти келаси йили Италияга қайтиши мумкин.
32 ёшли футболчи ватанида ўйнашни хоҳламоқда ва унинг хизматлари яқинда воситачилар орқали «Ювентус»га таклиф этилгани ҳақида журналист Мирко ди Натале хабар берди. «Кекса синьора» раҳбарияти Верраттини қайд этиш имкониятини кўриб чиқишга тайёр, бироқ бунинг барчаси собиқ «ПСЖ» юлдузининг молиявий талабларига боғлиқ бўлади. Шунингдек, дастлаб Турин грандида футболчи ҳали ҳам юқори даражада ўйнай олишини аниқлаб олиш нияти бор.
Марко Верратти жорий йил июль ойида «Ал-Араби»дан «Ал-Дуҳайл»га ўтган эди. Итальян футболчиси 2023 йили 11 йиллик «ПСЖ» фаолиятидан сўнг Қатарга кўчиб ўтган.
