«Барселона» ҳужумчиси Ферран Торрес «Эльче»га қарши 3:1 ҳисобидаги ғалабадан сўнг жамоа ўйини ҳақида фикр билдирди.
«Ўтган ҳафтаги “эл-класико”даги мағлубиятдан кейин ўз мухлисларимиз олдида ғалаба қозонишимиз керак эди. Менимча, ўйинимизда яхшиланиш сезиляпти, аммо осон бўлмади. “Эльче” ёпиқ ҳимояда ўйнади, бу эса бизга тўлиқ устунлик қилиш имконини бермади. Омадимиз бор экан, яратилган имкониятлардан фойдаландик», — дея Торреснинг сўзларини келтирган Barca Universal нашри.
Ферран Торрес учрашувнинг 12-дақиқасида Ламин Ямалнинг биринчи голидан кўп ўтмай ҳисобдаги фарқни оширди. Меҳмонлар 42-дақиқада битта гол урди, аммо 61-дақиқада Маркус Рэшфорд учинчи голни киритиб, баҳсга нуқта қўйди.
