3 ноябрь куни "Насаф" клуби ОФК Элит Чемпионлар Лигаси мусобақасининг 4-тур доирасида Бирлашган Араб Амирликларининг "Ал Ваҳда" жамоаси билан куч синашади.
Келинг, ушбу жамоа ҳақида бироз тўхталамиз.
"Ал Ваҳда" жамоаси 41 йиллик тарихга эга бўлиб, клуб 1984 йилда "Абу Даби SK" ва "Ал Эмирейтс" жамоаларининг бирлашувидан ташкил топган.
Жамоага мухлислар томонидан "The Maroons" (“тўқ қизиллар”) деган лақаб берилган.
"Ал Ваҳда" ўз уй учрашувларини Абу Даби шаҳридаги "Ал Наҳён" стадионида ўтказади. Ушбу майдон 15 мингдан зиёд мухлисни сиғдира олади.
Жамоа БAA чемпионатининг 4 карра ғолиби, 2 карра Президент кубоги соҳиби ва 4 карра мамлакат Суперкубоги ғолиби ҳисобланади.
"Ал Ваҳда" шу вақтгача Осиё Футбол Конфедерацияси томонидан ўтказилган расмий мусобақаларда 81 та ўйин ўтказган. Уларнинг 29 тасида ғалаба қозонган, 25 тасида мағлубиятга учраган ва 27 баҳсда дуранг қайд этган.
Жамоани ҳозирда 60 ёшли анголалик мутахассис Хосе Мораиш бошқармоқда. У ўз фаолияти давомида "Интер", "Реал Мадрид", "Челси" каби клубларда ишлаган.
Мураббий "Чонбук Моторс" жамоаси билан икки бор Жанубий Корея чемпиони бўлган, "Ал Ҳилол" билан Саудия Арабистони Профессионал лигаси ғолиблигини, шунингдек, 2023/24 йилги мавсумда "Сепахон" клуби билан Эрон Ҳазфи кубогини қўлга киритган.
Жамоа таркибида ҳозирда Душан Тадич, Дарко Лазович, Факундо Круспзки, Омар Ҳарбин, Кайо Канедо ва Лукас Пимента каби Европа ҳамда Осиё футболида ном қозонган футболчилар тўп тепмоқда.
Бу клуб Ўзбекистон миллий терма жамоаси футболчилари учун ҳам бегона эмас. Яқин йилларда "Ал Ваҳда" сафида терма жамоамиз аъзоси Ҳожимат Эркинов фаолият юритган.
Эслатиб ўтамиз, ОФК Элит Чемпионлар Лигаси 4-туридан ўрин олган "Насаф" – "Ал Ваҳда" учрашуви 3 ноябр куни соат 18:45 да старт олади.
