"Реал Мадрид" ҳужумчиси, жамоанинг белгиланган пенальтичиси Килиан Мбаппе энди ўйинлар вақтида жамоадошларига пенальтидан фойдаланиш ҳуқуқини бермайди. Пенальти белгиланган вақтда "Реал Мадрид" ҳисобда олдинда бораётган тақдирдагина истисно бўлади.
Бу ҳақда The Athletic нашри хабар берди.
Манба берган хабарга кўра, франциялик футболчи Испания чемпионатининг 11-турида "Валенсия"ни мағлубиятга учратган (4:0) вақтида "Реал" ҳужумчиси Винисиус Жуниор пенальтидан ноаниқ фойдаланганидан кейин шундай қарорга келган. Бразилиялик футболчи 43-дақиқада пенальтини амалга ошира олмади. Ўшанда 2:0 ҳисоби Мадрид клуби фойдасига ҳал бўлаётганди.
