“Арсенал” бош мураббийи Микель Артета жамоа ярим ҳимоячиси Микель Мерино ҳақида илиқ фикр билдирди ва унинг кўп қиррали ўйинини алоҳида таъкидлади.

Испаниялик хавбек "Славия"га қарши ЕЧЛ ўйинида (3:0) дубль муаллифи бўлди.

“Мерино жамоада бўлиши — ҳақиқий бахт. Унинг майдондаги универсаллиги, менталитети, етакчилик фазилатлари ва инсон сифатидаги муносабати мен учун жуда муҳим”, — деди Артета.

Мураббий шунингдек, Меринонинг Чемпионлар лигасидаги ажойиб ўйини ҳақида ҳам тўхталиб ўтди:

“У Чемпионлар лигаси баҳсида ҳужумчи сифатида майдонга тушди — бу умуман унинг позицияси эмас. Лекин у икки гол урди. Бу — ҳақиқий профессионаллик намунаси.”

Артета таъкидлашича, Меринонинг жамоага таъсири нафақат ўйин сифатида, балки руҳий жиҳатдан ҳам катта аҳамиятга эга.