Мадриднинг «Реал» клуби вингери Винисиус Жуниор жамоани тарк этиши мумкин, деб хабар бермоқда El Chiringuito TV.

25 ёшли бразилиялик футболчи билан шартномани узайтириш бўйича музокаралар самара бермаётгани ва ҳозирча ҳеч қандай олдинга силжиш кузатилмаётгани айтилмоқда. Манба маълумотича, «Реал» футболчини 150 миллион евро деб баҳолаган ва уни арзонроқ нархга қўйиб юбориш ниятида эмас.

Винисиус эса фаолиятини давом эттириш учун бошқа вариантларни кўриб чиқишни бошлаган. Агар у Мадридни тарк этишга қарор қилса, унинг асосий йўналиши Англия Премьер-лигаси бўлади — у энг юқори даражада ўйнашни хоҳлайди ва Саудия Про-лигасига ўтиш нияти йўқ. Илгари «Манчестер Юнайтед» Винисиус Жуниорга қизиқиш билдиргани ҳақида хабар берилган эди.

Жорий мавсумда Винисиус клуб даражасида 14 та ўйинда майдонга тушиб, 5 та гол урган ва 4 та голли узатма амалга оширган.