"Барселона" вакиллари жамоанинг собиқ футболчиси Лионель Мессининг кутилмаганда "Камп Ноу"га ташриф буюрганидан ҳайрон бўлишди. Аввалроқ у ўзининг ижтимоий тармоқлардаги саҳифасида стадиондан олинган суратлар ва матнни эълон қилганди.
Sport.es порталининг "Барселона"даги манбалари қайд этишича, Мессининг стадионга келиши ҳақида ҳеч кимга хабар берилмаган. Аргентиналик футболчининг пости ижтимоий тармоқлар ва янгиликлар нашрларида тезда тарқалди, клуб раҳбарияти эса бунга ишона олмади.
Унинг стадионга қандай киргани номаълумлигича қолмоқда. Ҳозир клубда Мессига ким ёрдам берган бўлиши мумкинлигини аниқлашга ҳаракат қилишмоқда. Футболчига яқин манбаларнинг тасдиқлашича, аргентиналик футболчи бу ташрифни клубнинг ҳеч бир аъзоси билан келишмаган ва буни ўз ташаббуси билан амалга оширган.
Месси 9 ноябрь оқшомида "Камп Ноу"га ташриф буюрди. У 14 ноябрь куни Испания ҳудудида бўлиб ўтадиган Анголага қарши ўртоқлик ўйинига тайёргарлик кўриш учун Аргентина терма жамоасига қўшилади.
